O II Concurso de deseño do suadoiro e outros artigos da Facultade de Economía e Empresa entrega o galardón á alumna gañadora

A alumna Elena Cainzos López do Grao en Simultaneidade en ADE e Dereito gaña o II Concurso de deseño do suadoiro e outros artigos da Facultade de Economía e Empresa convocado polo Pan de Acción Titorial (PAT) do centro.

A través do Concurso de deseño do suadoiro e outros artigos da Facultade de Economía e Empresa, que celebra xa a súa 2ª edición, o PAT da Facultade de Economía e Empresa pretende dar unha maior publicidade e visibilidade tanto á Facultade coma ao seu PAT.

Nesta convocatoria o xurado composto por representantes do PDI, o PAS e o alumnado, valorou os 15 deseños presentados, tendo en conta especialmente aqueles traballos que tiñan un motivo ou mensaxe principal que representaba á Facultade de Economía e Empresa e o seu estudantado. Todos eles poden visualizarse tanto na web da Facultade coma nunha exposición na biblioteca do centro.

Dos deseños presentados, resultou galardoado o elaborado pola estudante do Grao en Simultaneidade en ADE e Dereito Elena Cainzos López. En palabras da autora, no deseño gañador “se muestran las siglas FEE de, Facultade de Economía e Empresa, con un dibujo de la Torre de Hércules como elemento representativo de A Coruña”.

A alumna recolleu o seu galardón, hoxe 23 de Maio, no Salón de Graos da Facultade de Economía e Empresa, da man da Decana da Facultade, Carmen Lema, e o Coordinador do PAT, Joaquín Enríquez. O premio consistiu nun cheque por valor de 200 euros e un lote de artigos co deseño gañador.

Ao acto de entrega asistiron, entre outros, membros do Xurado: o Vicedecano de Estudantes e Comunicación - José Javier Orosa González -, a bibliotecaria da FEE – Carlota Balsa – e a profesora adxunta ao Vicerreitorado de Estudantes Estefanía Mourelle.